विराटनगर । चोरहरुको एउटा समूहले बिराटननगरस्थित आयल निगममा पार्किङ गरी राखेको डिजेलको ट्यांकर चोरी गर्ने जमर्को गर्यो तर असफल भए । ट्यांकर सय मिटर पर पुर्याएपछि ट्यांगर बिग्रिँदा ती चोरहरुको समूह एक ग्यालेन डिजेल चोरेर फरार भयो ।
तीन जनाको समूहमा मोटरसाइकलमा आएका चोरहरुले ट्यांकरभित्र रहेका सहचालकको हातखुट्टा बाँधेर ट्यांकरलाई नियन्त्रणमा लिई सय मिटर टाढासम्म पुर्याएका थिए तर ट्यांगर बिग्रिँदा उनीहरुले ग्यालेनमा निकालेर इन्धन चोरी गरेको सहचालकको भनाइ उद्धृत गर्दै प्रहरीले बताएको छ ।
अज्ञात समूहले ट्यांकर नियन्त्रणमा लिएको खबर सुनेर पुगेको प्रहरी टोलीले ग्यालेनमा निकालेको केही इन्धन भने बरामद गरेको छ । उनीहरुले एक ग्यालेनको झन्डै एक सय लिटर भने लिएर भागेका छन् ।
घटनामा संलग्न भएको आशंकामा एकजनालाई नियन्त्रणमा लिइएको र अनुसन्धान भइरहेको प्रहरीले जनाएको छ ।
जोगवनी नाकाबाट इन्धन लिएर आएको ना २ ख ५०२९ नम्बरको ट्यांकर मंगलबार बिहान डिजेल अनलोड गर्ने भन्दै सोमबार राति निगमको पार्किङस्थलमा राखिएको थियो ।
No comments