प्यारालाइसिस रोग निको पार्ने भन्दै धामीले तातो पानी शरीरमा खनाइ दिँदा गम्भीर घाइते

दाङ। धामीले प्यारालाइसिस रोग निको पार्ने भन्दै तातोपानी शरीरमा खनाइदिँदा गम्भीर घाइते भएकी हाँसीपुर–१ दाङकी थुमसरा विकको उपचारमा आर्थिक समस्या परेको छ ।

आर्थिक अवस्था कमजोर हुँदा उपचारमा समस्या भएको उनकी छोरी दमन्ता विकले बताइन् ।  कोइलावासमा आफूलाई धामी बताउने कमल क्षेत्रीले प्यारालाइसिस निको पार्ने भन्दै फागुन २६ गते थुमसराको शरीरमा तातोपानी खन्याइदिएका थिए ।

थुमसरालाई गम्भीर घाइते अवस्थामा तातोपानी खन्याएको १० दिनपछि मङ्गलबार मात्रै  राप्ती उपक्षेत्रीय अस्पतालमा ल्याइएको थियो । शरीरको दाहिने भाग २० वर्षदेखि  नचल्ने अवस्थामा रहेकी थुमसरालाई निको पार्ने भन्दै धामीले तातोपानी शरीरमा खन्याएका थिए ।

घोराहीमा सामान्य उपचारपछि थप उपचारका लागि उनलाइ पाल्पाको मिसन अस्पतालमा पुर्याइएको छ । ऋण काढेर उपचारका लागि पाल्पा पुर्याइएको र उपचारमा सहयोग गरी ज्यान बचाइदिन छोरी दमन्ताले सबैसँग आग्रह गरेकी छिन् । तातोपानीले थुमसराको शरीरको करिब ६० प्रतिशत भाग पोलेको छ ।

यसैबीच, प्रहरीले शरीरमा तातोपानी खन्याउने कमल क्षेत्रीलाई उपचारको जिम्मेवारी लिन भनेको छ । बुधबार कोइलावासबाट पक्राउ परेका क्षेत्रीलाई इलाका प्रहरी कार्यालय गढवामा राखिएको र उपचार खर्च बेहोर्न भनेको दाङका प्रहरी प्रमुख एसपी कुबेर कडायतले जानकारी दिए ।