हेर्दा हेर्दै जब घर भासियो एउटा तल्ला गायब !

सिन्धुपाल्चोक, वैशाख २९ - नासा बुलेट क्लबका तर्फबाट सिन्धुपाल्चोक र दोलखाका महाभूकम्प पीडित क्षेत्रमा राहत वितरणका लागि मंगलबार १६ जना बुलेट चालक सिन्धुपाल्चोक पुगियो । सिन्धुपाल्चोकको जुरेसम्म पुग्ने हाम्रो योजना थियो । तर, १२ : ५० को महाभूकम्पले हाम्रो योजनालाई बीचमै रोकिदियो ।

खाडीचौर नजिकै अँधेरी पुग्दा सशस्त्र प्रहरीको एउटा समूह दौडिदै हामीतिर आएको देखियो । लगत्तै मोटरसाइकल नियन्त्रणबाहिर जान थालेपछि भूकम्प आएको थाहा भयो । मोटरसाइकल त्यही छोडेर क्यामेरा निकालेर फोटो खिच्न तिर लागियो । 

भूकम्पको कम्पन जारी रहेका बेला सशस्त्र प्रहरीको चेक पोस्ट नजिक हल्लिइरहेका घरहरुको फोटो खिच्न थाल्दै थिएँ । पहिलो कम्पनमा खासै केही भएन । दोस्रो कम्पनलगत्तै ठूलो आवाज आयो । एउटा घर भासिएको रहेछ । पहिलो कम्पनमा मैले तस्विर लिएकै घर भासिएको रहेछ । पहिलो तस्विरमा चार तलाको देखिएको घरको दोस्रो तस्विरमा एउटा तलै थिएन । भासिएर यो घर तीन तल्लाको बनिसकेको थियो । 

घर भासिए पनि मानवीय क्षति भने भएको छैन । यो क्षेत्रमा केही मानिस घाइते भएका छन् ।